पीएसजीमा एमबाप्पेको सपना जिउँदै

च्याम्पियन्स लिगको नकआउट चरणमा पीएसजी घरमै भएको खेलमा पराजित हुँदा कहिल्यै अर्को चरण पुगेको इतिहास छैन । यस्तोमा नोउ क्याम्पमा यसपल्ट भएको खेलमा सुरुमै बार्सिलोनाले गोल गरेपछि पीएसजी दबाबमा आइसकेको थियो । कतारी लगानी रहेको पीएसजी पछिल्ला सात सिजनमध्ये पाँचमा अन्तिम १६ बाट नै बाहिरिएको इतिहास छ । तर, बार्सिलोनाले रातो कार्डमा रोनाल्ड एराउजोलाई गुमाएपछि खेल पीएसजीको पक्षमा मोडिन थालेको थियो ।

बार्सिलोनाले एक घण्टा जतिको समय १० खेलाडीमै सीमित रहेर खेलेको थियो । यसले पीएसजीलाई सजिलो बनायो र ४–१ को गतिलो जित निकाल्न सफल रह्यो । नतिजा पीएसजी निर्णायक रूपमा ६–४ ले अगाडि रह्यो । पीएसजीले एक खेलाडी बढी भएको स्थितिको खुबै फाइदा लियो र आक्रामक भएर प्रस्तुत भयो । ओसमन डेम्बले बार्सिलोनाका पुराना खेलाडी हुन्, तर उनले नै पीएसजीका लागि पहिलो धावा बोले । सुरुमै उनले बराबरी गोल गरे ।

त्यसपछि पेनाल्टी पनि जिते । त्यसैलाई एमबाप्पेले गोलमा परिणत गरेपछि पीएसजी दुई टाइको खेलमा अगाडि रह्यो । त्यसबीच भिटिन्होले एक गोल गरे । पहिलो लेगमा पनि उनले गोल गरेका थिए । खेलको अन्त्यतिर एमबाप्पेले फेरि एक गोल थपे । खेल सकिएको के संकेत मिलेको थियो, पीएसजीका खेलाडीले खुबै जोडदार तरिकाले खुसीयाली मनाए । पीएसजीका अध्यक्ष नासेर अल–खेलाफीले टिमको यो जितलाई ऐतिहासिक रहेको दाबी गरे ।

यो जितले सन् २०२१ को च्याम्पियन्स लिगकै खेललाई सम्झाएको छ । त्यस वर्ष एमबाप्पेले बार्सिलोनाको भ्रमणका क्रममा ह्याट्रिक रचेका थिए । त्यस क्रममा पीएसजी समग्रमा ५–२ ले अगाडि थियो । तर, पीएसजीले सन् २०१७ को हार बिर्सन सकेको छैन होला । त्यतिबेला घरमा भएको खेलमा पीएसजी ४–० ले विजयी रह्यो । तर बािर्सलोनाको भएको दोस्रो लेगको खेलमा ६–१ को सर्वथा खराब हार बेहोरेको थियो ।

सात वर्षअघिको त्यस खेलमा बार्सिलोनालाई ८८ मिनेटसम्म तीन गोल चाहिएको थियो । टोलीले तीन गोल गरेको पनि थियो । यसपल्ट खेलको स्थिति आफ्नो पक्षमा मोड्ने पालो पीएसजीको रह्यो । अब पीएसजीसामु पछिल्लो ५ वर्षमा दोस्रोपल्ट फाइनल प्रवेशको सम्भावना बनेको छ । ‘यो जितको धेरै अर्थ छ,’ डेम्बेले पनि मान्छन्, ‘हामीलाई ठूलै आस छ, यसपल्ट हामी फाइनल पुग्नेछौं र वेम्बलीमा उपाधिका लागि भिड्ने छौं ।’

सन् २०१७ को त्यस हारपछि पीएसजीले दुई ठूला स्टारलाई अनुबन्ध गरेको थियो । त्यसमा एक एमबाप्पे नै भए भने अर्का थिए, नेयमर । नेयमर गत वर्ष नै पीएसजी छाडेर साउदी अरेबिया गएका छन् । एमबाप्पेले पनि यो सिजनको अन्त्यसँगै पीएसजी छाड्ने भनिसकेका छन् । सिजनको अन्त्यमा एमबाप्पे र पीएसजीबीचको अनुबन्ध सकिनेछ । लगभग निश्चित छ उनी रियल म्याड्रिड जाने । यस्तोमा एमबाप्पेसामु यसपल्ट च्याम्पियन्स लिग जित्ने अवसर बनेको छ ।

सन् २०२० मा पीएसजी एकपल्ट च्याम्पियन्स लिगको फाइनल पनि पुगिसकेको छ, तर उपाधि भिडन्तमा बायर्न म्युनिखसँग पराजित रह्यो । एमबाप्पे जत्तिको उत्कृष्ट खेलाडी भएर पनि पीएसजीले च्याम्पियन्स लिग जित्न नसकेको चर्को आलोचना हुने गर्छ । एमबाप्पे स्वयं गोलको लयमै छन् । उनले ४१ गोल गरिसके यो सिजन । च्याम्पियन्स लिगमा उनी अर्धशतकीय गोलबाट दुईमात्रै टाढा छन् । के एमबाप्पेले साँच्चै पीएसजीका लागि यसपल्ट च्याम्पियन्स लिग जित्ने छन् त ?