‘लेभरकुजन’ अब रहेन ‘नेभरकुजन’

त्यसैले जर्मन भाषामा टोलीलाई ‘भिजकुसेन’ भनिन्थ्यो, जसको सरासर अर्थ ‘नेभरकुजन’ नै हो । यसको सार भनेको सधैं दोस्रो हुने जस्तै हो वा कहिल्यै केही नजित्ने । लेभरकुजनले अहिलेसम्म जितेको भनेकै दुई ठूला उपाधि हुन् । त्यो पनि सन् १९९३ यता केही जित्न सकेको थिएन । त्यसैले धेरैलाई के लागेको थियो भने लेभरकुजनले साँच्चै केही पनि जित्न सक्ने छैन ।

तर, जाभीले अर्कै सोचेका थिए । पहिलो पटक पूर्ण सिजनका लागि क्लब सम्हाल्ने क्रममा उनले लेभरकुजनलाई लिग च्याम्पियन बनाए । अब त उनका सामु तीन उपाधिको सम्भावना कायम छ । त्यो भनेको ‘ट्रेबल’ भयो उपाधि । टोली बिहीबार युरोपा लिगमा वेस्ट ह्यामविरुद्ध दोस्रो लेग खेल्न लन्डन जाँदै छ । टोलीले घरेलु मैदानमा पहिलो लेग २–० ले जितेको थियो । अलोन्सोले वेस्ट ह्यामसँगको खेलबाट ७ खेलाडी परिवर्तन गर्दै आइतबार जर्मन लिगको वेर्डर ब्रेमेनविरुद्धको खेलमा उतारेका थिए । फेरि लेभरकुजन यस सिजन अपराजित छ ।

सन् १९९९–२००० को सिजनमा लेभरकुजनलाई लिग उपाधि जित्न अन्तिम खेलमा उन्टरहाचिङविरुद्ध एक अंक आवश्यक थियो । अहिले तेस्रो डिभिजनमा रहेको यही क्लबविरुद्ध लेभरकुजन २–० ले पराजित रह्यो । त्यसमा एक गोल माइकल बालाकको नाममा आत्मघाती थियो । त्यही दिन बायर्न म्युनिखले वेर्डर ब्रेमेनलाई हराएर फेरि एकपल्ट लिग उपाधि चुम्यो ।

सन् २००२ मा अति नै भयो । लिगमा अन्तिम तीन खेल बाँकी छँदा लेभरकुजन ५ अंकको अग्रतासहित शीर्षस्थानमा थियो । अझ टिम जर्मन कप र युरोपेली च्याम्पियन्स लिगको फाइनल पनि पुगेको थियो । तर, सिजन अन्त्यमा लेभरकुजनले केही पनि जित्न सकेन । अहिले जर्मन राष्ट्रिय टिमका निर्देशक रुडी भोलर खुबै खुसी छन् । उनले लेभरकुजनका लागि खेले र प्रशिक्षक पनि बने । उनलाई लाग्छ, जाभीले सबै आलोचकको मुख बन्द गरेका छन् ।

भोलरले भनेका छन्, ‘अब कसैले पनि नेभरकुजन भन्ने छैनन् । जतिबेला यस्तो भनिन्थ्यो, मलाई असाध्यै रिस उठ्यो ।’ उनी क्लबले अझ राम्रो गर्ने दाबीसमेत गर्छन् । क्लबको यो सफलताले प्रशिक्षक जाभीमाथि लिभरपुल र बायर्न दुवैको नजर परेको छ । तर, उनी अर्को सिजन पनि लेभरकुजनमै बस्न चाहन्छन् । लिग सुरु हुँदा लेभरकुजनको दर्शक संख्या ३४ हजार पुग्थ्यो । अहिले ५४ हजार पुग्न थालेको छ । खेलाडी छँदा

जाभी उत्तिकै सफल रहे । जताजता गए, त्यहाँ सक्दो उपाधि जिते ।

जाभीले जर्मनी र स्पेनमा लिग उपाधि जिते । लिभरपुल र रियल म्याड्रिडका लागि युरोपली च्याम्पियन्स लिग पनि जितेका छन् । त्यसमा कप उपाधि अझ धेरै छन् । उनले स्पेनका लागि दुईपल्ट युरोपेली उपाधिमात्र जितेनन्, यसबीचका विश्वकप पनि चुमे । उनी अहिले आफैं भन्छन्, ‘लेभरकुजन आउँदा यसलाई नेभरकुजन भन्ने मलाई पनि थाहा थियो । त्यसलाई अन्ततः तोड्न सकेकोमा म धेरै खुसी छु, यो ठूलो गर्वको उपलब्धि पनि हो ।’

लेभरकुजनको घरेलु मैदान बाएरिना ३० हजार दर्शक क्षमताको छ । रंगशाला भएको यो स्थानलाई प्रायः गरी बिसमार्क स्ट्रिट भनिन्छ । लेभरकुजनले आइतबार जर्मन लिग फुटबलको उपाधि जितेपछि टोलीका समर्थकहरू आफ्ना प्रशिक्षकको सम्मानमा ‘जाभी अलोन्सो स्ट्रिट’ भनेर गीत गाइरहेका थिए ।