इटहरी गोल्डकप फुटबल : चर्च ब्वाइज सेमिफाइनलमा

चर्च ब्वाइजको जितमा अबायोमी फकुन्ले र सुरजज्यू ठकुरीले गोल गरेका थिए । एनआरटीका अफिज ओलावालेले एक गोल फर्काए पनि त्यो पर्याप्त भएन ।

खेलको ३७ औं मिनेटमा अबायोमीले गोल गर्दै चर्च ब्वाइजलाई अग्रता दिलाए । पहिलो हाफमा १–० को अग्रता लिएको चर्च ब्वाइजमाथि एनआरटीले ८२ औं मिनेटमा गोल फर्कायो । शिशिर लेखीको पास सदुपयोग गर्दै ओलावालेले खेल १–१ गोलको बराबरीमा ल्याए । लगत्तै त्यसको एक मिनेट बित्न नपाउँदै चर्च ब्वाइजका सुरजले गोल गरी टिमलाई पुनः २–१ को अग्रता दिलाए । उनले उक्त गोल वैकल्पिक खेलाडी मिलन राईको पासमा गरेका हुन् । मिलन ७५ औं मिनेटमा राजेश परियारको ठाउँमा मैदान छिरेका थिए ।

मंगलबार म्यान अफद म्याच चर्च ब्वाइजका सुरजज्यू ठकुरी भए । उनलाई १० हजार प्रदान गरे । चर्च ब्वाइजले दोस्रो सेमिफाइनलमा बिहीबार आयोजक राष्ट्रिय जागृति क्लबसँग प्रतिस्पर्धा गर्नेछ ।

आयोजक टिम पाहुना टोली कञ्चनजंघा फुटबल क्लबलाई पराजित गर्दै सेमिफाइनल पुगिसकेको छ ।

बुधबार पहिलो सेमिफाइनलमा त्रिभुवन आर्मी र साबिक बिजेता सगरमाथा फुटबल क्लब मोरङबीच प्रतिस्पर्धा हुनेछ । आर्मीले बिर्तामोड युनाइटेड र सगरमाथाले एपीएफलाई हराएका थिए । फाइनल शनिबार हुनेछ ।